Intervistë ekskluzive me “Zonjën e muzikës zbavitëse” Liliana Çavolli

Çdo këngë për mua është si një fëmijë i dashur, nuk i dalloj këngët! Fëmijët mund t’i dalloj nëna? Por ka këngë që publiku i ka pranuar më mirë. Ndërsa për mua janë të gjitha njësoj, sepse është një përjetim, është një pjesë e zemrës sime aty, pra një pjesë të zemrës ia kam falë çdo kënge.


Liliana Çavolli u shqua si artiste e rrallë e cila pushtoi majat e muzikës zbavitëse, por shkëlqeu edhe në zhanre të tjera. U lind në Prizren më 5 maj të vitit 1942, nga nënë Miseretja - aktore e këngëtare dhe babai Isak Çavolli, mësues. Liliana ishte fëmijë dhe mezi e mban në mend kur familja e saj u shpërngul në Shkup ku qëndroi disa vjet.
Po në Shkup Liliana pati paraqitjen e parë në radio pa e ditur se ky ishte hapi i saj i parë në karrierë. Nëna e Lilianës ishte këngëtare dhe një mëngjes e mori si shoqëruese në një paraqitje në radio.
Fati përsëri e ktheu në Prizren ku Liliana filloi të hedh shtat si vajzë, por edhe si këngëtare. Njëkohësisht ndoqi mësimet e solo-këndimit në shkollë të mesme të muzikës dhe u anëtarësua në SHKA “Agimi”.

Talenti, zëri dhe puna në Prizren bënë që Liliana të shquhet shpejt si emër premtues. Këto karakteristika e bënë më të lehtë ardhjen e saj në Radio Prishtinë. Këtu fillon një kapitull tjetër shumë i rëndësishëm për jetën dhe karrierën artistike të Liliana Çavollit.

Zëri, si dhuratë nga natyra, dhe dashuria për këngën ishin atutë kryesore të Lilianës që e bënë të admiruar. Por, nuk ka munguar edhe mbështetja dhe mirëkuptimi nga kolegët dhe kompozitorët si : Skënder Gjinali, Musa Piperku, Severin Kajtazi, Gjergj Kaçinari, Isak Muçolli etj., ndaj të cilëve Liliana është shumë mirënjohëse.
Opusi i këngëve të Lilianës është shumë i gjerë dhe ajo, siç vlerësojnë krijuesit dhe kritikët e muzikës, interpretoi shkëlqyeshëm në të gjitha zhanret. Si nëna që i do të gjithë fëmijët njësoj, thotë Liliana, e kam të vështirë të veçoj se cilin pëlqej më shumë. Liliana është e sigurt se me sukses do të mund ta provonte veten edhe në interpretimin e muzikës klasike. Ne të gjithë jemi kënaqur me këngën e Lilianës. Jemi kënaqur e gëzuar edhe për faktin se ishte një paraqitje e mrekullueshme e këngës shqipe nëpër botë, pothuaj në të gjitha kontinentet. Liliana edhe në këtë moshë, ende e ka zërin, ka edhe dëshirën për të realizuar ndonjë projekt dhe ka dashamirët e shumtë të këngës së saj që do të gëzoheshin nga një hap i tillë. E pse të mos ndodh kjo?Në Radio Prishtinë Liliana këndonte vet dhe këndonte bukur por njëkohësisht ka dhënë një ndihmesë që edhe këngët tjera, që transmetoheshin, të kishin nivelin e duhur artistik. Liliana ishte redaktore e muzikës dhe udhëheqëse e emisioneve të paharrueshme si “Unë ti muzika dhe poezia”, “Evergeen” etj. Edhe sot ajo udhëheq emisionet më të dëgjuara muzikore në Radio Kosovë ku ndihet shumë mirë.


Liliana Çavolli ishte dhe do të mbetet “ Zonjë e muzikës zbavitëse”.


Blue Sky : Jeni ndër këngëtaret më me emër, keni qenë redaktore e muzikës në ish Radio Prishtinë dhe autore e disa emisioneve ndërsa tash jeni autore e dy emisioneve shumë të dëgjuara në Radio Kosovë ! A mund ta tërhiqni një paralele nga koha kur keni punuar në Radio Prishtinë me të sotmen kur punoni në Radio Kosovë?

Lili: S’ka ndonjë dallim të madh! Punoj me dashuri dhe entuziazëm si dikur! Jam e lumtur që më dëgjojnë edhe më tutje ata që dikur kanë qenë gjeneratë e re e tash janë të rritur.

Blue Sky: Rridhni nga një familje artistësh. Nëna juaj, Meserete Çavolli, ka qenë këngëtare dhe aktore. Keni lindur në Prizren, jeni rritur në Shkup. Jeni rikthyer në Prizren ku edhe keni mbaruar shkollën e muzikës. Pse kjo lëvizje Prizren-Shkup-Prizren?

Lili: Në vitin 1953 u larguam nga Kosova për në Shkup ngase i ndjeri babi im, Isak Çavolli, ka qenë i përndjekur nga UDB-a serbe dhe gjithnjë i burgosur. Prandaj shkuam në Shkup, me nënën dhe dy vëllezërit e mi, dhe jetuam atje vite të tëra. U kthyem në Prishtinë. Nëna ime ishte aktore në Prishtinë fillimisht, e pastaj edhe në Shkup njëherësh ishte edhe një ndër këngëtaret e para të Kosovës, krahas Zehra Mulës, pastaj kanë ardhur Vera Shahta e më pas Nexhmije Pagarusha, Sanije Shala e kështu me radhë.

Blue Sky: Çka kujtoni nga fillimet tuaja në fushën e muzikës? Si lindi dashuria për këngën?

Lili: Diku në vitet e 60 u paraqita dhe unë si pasardhëse e nënës sime, se këngën e kam kultivuar në shtëpi, jam rritur me këngën. Nëna ime ka qenë për nga natyra shumë e gjallë dhe duke kryer punët edhe këndonte, ndërsa unë e përcillja me zërin e dytë. Mund të kujtoj me këtë rast kur në Radio Shkup, isha shumë e vogël, nëna këndonte gjallë, pra drejtpërdrejtë, shkonim në mëngjes në radio, me që ishte drejtpërdrejtë, dhe unë e përcillja në këngë. P.sh. kemi pasur disa duete të cilat pastaj, në Radio Prishtinë, i kemi regjistruar. Nuk jam e sigurt a ekzistojnë më ato këngë. Do doja shumë që t’i kem në fonotekën time, më shumë për shkak të vajzës sime e cila do donte shumë që t’i ketë. Edhe babai im ka qenë adhurues i këngës e muzikës. Të gjithë kemi kënduar, ka qenë një atmosferë muzikore në shtëpi.

Blue Sky: Keni qenë gjithashtu edhe pjesëtare e SHKA “Agimi”. Paraqitja e parë para publikut kosovar a ju kujtohet?

Lili: Po, paraqitja e parë ka qenë si pjesëtare e shoqërisë “Agimi” shoqëri me traditë. “Agimi” ka pasur në gjirin e vet orkestrën zbavitëse, popullore, korin. Atje jam paraqitur për herë të parë para publikut prizrenas me këngë zbavitëse nga festivali i Sanremos, i cili atëbotë ishte shumë i popullarizuar, festival Italian. Ne e dëgjonim në radio, i kopjonim këngët e tyre dhe i këndonim. Pastaj erdha në Prishtinë.

Blue Sky: Angazhimet e para nga kush i keni marrë?

Lili : Ishte befasi për mua, sepse isha në shkollë të mesme atëherë, në solo këndim, kisha pjesë solo në koncertin e diplomës dhe kështu më dëgjuan disa njerëz të Radio Prishtinës si, z. Skënder Gjinali, i cili atëbotë ishte drejtor i produksionit muzikor, dhe ai kur më dëgjoi më ftoi që pasi ta kryej shkollën të vij në Prishtinë e të punësohem në radio. D.m.th. ishte viti 1962 e unë veç isha e punësuar ku kryeja dy punë: isha redaktore e muzikës në redaksinë zbavitëse dhe soliste e cila vepronte, pra këndonte e incizonte.

Blue Sky: Keni kënduar të gjitha zhanret e muzikës : këngë për fëmijë, popullore, zbavitëse, madje kishit epitetin “Zonjë e Muzikës Zbavitëse”, ju përkëdhelte egon ky epitet?

Lili: Kështu thoshin gazetat dhe kritikët! Më shumë e kam kultivuar muzikën zbavitëse, edhe pse për mua çdo zhanër është i bukur dhe me vlera dhe i ndjej me shpirt. Por në opusin tim të incizimeve më së shumti kam këngë zbavitëse. Gjithashtu kam edhe shumë këngë për fëmijë, se fëmijët i dua shumë dhe kam kënduar për ta me shumë emocion. Bile, edhe tash do të kisha kënduar! Para disa vjetësh kam incizuar me aktoren Safete Rugova një kasetë shumë të bukur me ninulla. Safetja recitonte ninullat, ndërsa unë i këndoja. Ka qenë një gjë shumë e bukur.

Blue Sky: Keni prapa vetes një numër të madh këngësh, çmimesh, paraqitje në manifestime të ndryshme muzikore, festivale. Na kujto diçka nga ato aktivitete muzikore!

Lili: Kam marrë pjesë në të gjitha festivalet, përveç kur kam qenë në ndonjë turne nëpër botë, atëherë nuk kam mundur të jem edhe në festival edhe në turne! Megjithatë kam marrë pjesë në të gjitha “Akordet e Kosovës”, pastaj kam marrë pjesë në festivalet e ish Jugosllavisë si në “Opatia”, festival i Zagrebit, në Festivalin e Shkupit, në atë të Sarajevës..., qoftë në festivale popullore qoftë në ato zbavitëse.

Blue Sky: Do ta veçoje ndonjë këngë, të cilën e ke më për zemër?

Lili : Çdo këngë për mua është si një fëmijë i dashur, nuk i dalloj këngët! Fëmijët mund t’i dalloj nëna? Por ka këngë që publiku i ka pranuar më mirë. Ndërsa për mua janë të gjitha njësoj, sepse është një përjetim, është një pjesë e zemrës sime aty, pra një pjesë të zemrës ia kam falë çdo kënge.

Blue Sky: Unë e kam dashur shumë këngën “Flora, Floriana ime“, kjo mbase për shkak të emrit, por ja që unë këtë e kam dashur më shumë!

Lili: I kam unë disa Flora e Floriana të cilat dikur më kanë dashur për shkak të kësaj kënge mirëpo tash jemi shoqe shumë të mira, dhe, edhe unë i dua shumë, sidomos njërën!

Blue Sky: Pas një pauze të gjatë, për arsye që dihen, para luftës, po edhe vitin e parë pas luftës, të kemi parë e dëgjuar herë pas here në ndonjë lokal për Vitin e Ri, ose ndonjë mbrëmje për festa të ndryshme. Këto paraqitje nuk kanë qenë të shpeshta por për shumë kë befasuese. Lilana këndon drejtpërdrejtë edhe në këtë moshë !

Lili: Eh Florë, çfarë të të them ? E kam ruajtur zërin tim. Kjo, sepse e kam dashur shumë profesionin tim! E kam dashur shumë këngën. Kam bërë çmos që t’ mos e humb zërin edhe pse në moshë të shtyre. Janë të rrallë këngëtarët që mund të këndojnë në këtë moshë, në të cilën jam unë. Para luftës tri net me radhë isha në një lokal, këtu në Prishtinë dhe t’ ju them të vërtetën kam pasur kënaqësi të veçantë të këndoj dhe këtë e kam bërë më gjithë shpirt. Aty kanë qenë shumë njerëz të cilët me vite të tëra kanë dëgjuar këngën time dhe shumica prej tyre edhe ishin adhurues të këngës sime, kështu që përgjegjësia ishte shumë më e madhe. Aty kishte edhe të rinj të cilët më dëgjonin dhe pyesnin : kush është kjo këngëtare që s’e kemi parë e as dëgjuar! Dhe kishin të drejtë që pyesnin sepse atë kohë nuk funksiononte asgjë, e aq më pak mundësia e prezantimit të kulturës sonë muzikore. Çdo gjë ishte suprimuar! Le të mos kthehemi në atë kohë se nuk dua ta kujtoj!

Blue Sky: Mirë, të flasim për të sotmen. Para mbase më pak se një viti u paraqitët me një këngë të re, kur askush nuk e priste! Ishte kjo një këngë me një tekst të kolegut tim Haki Kika, kompozuar nga Menan Kiseri. Kënga është shumë ritmike, për disko më shumë do thosha! Si lindi kjo këngë?

Lili : Krejt spontanisht bashkëpunova me Menan Kiserin në kuadër të “Pop Idolit”. Menani ma ofroi këtë këngë ritmike dhe unë e këndova me temperamentin rinor,se e tillë jam. Njeriu është i ri aq sa e ndien veten. Të them të drejtën mua më pëlqen. Pastaj miku im, Haki Kika, bëri një tekst interesant me titull “Emrin e kam grua”. Fatkeqësisht për shkaqe materiale nuk kam bërë spot. Në këtë kohë, spotet e popullarizojnë shumë këngën, në një farë mënyre i imponohet dëgjuesit!

Blue Sky: Në një intervistë para do kohe që patëm bërë bashkë, ke pasur vërejtje në muzikën që krijohej e dëgjohej nëpër radiot tona. Po sot, ka ndryshuar diçka?

Lili: Fatkeqësisht shumë pak! Mbase më shumë në muzikën zbavitëse. Vazhdojnë trendët e huazimeve nga muzika e fqinjëve tanë. Kështu, ka shumë pak muzikë origjinale që tingëllon shqip. Te kompozimet e krijuara në frymën e muzikës popullore, fatkeqësisht, gjendja është “status quo” përveç te muzika patriotike që e kultivojnë disa këngëtarë.

Blue Sky: Këngëtarët e rinj për çka do t’i lavdëroje dhe për çka do t’iu bëje vërejtje?

Lili : Këngëtarët e rinj të mos harrojnë t’iu përmbahen vlerave tona muzikore. Melosin tonë popullor e respekton çdokush që e ka dëgjuar! Ata duhet të këndojnë me aranzhime të reja, me saund të ri, me interpretime moderne, por le të jetë baza kënga jonë popullore.

Blue Sky: Mbesim te këngëtarët e rinj. A do të veçoje ndonjërin, qoftë për kualitetet e zërit qoftë për interpretimin a ndonjë gjë tjetër?

Lili : Shiko, ka shumë këngëtarë të mirë, të rinj, të cilët vërtet meritojnë respekt nga ne! Edhe këndojnë bukur edhe janë punëtorë, kërkues etj. Nuk do të kisha dashur t’i përmend me emra në këtë moment se edhe mund të harroj ndonjërin mirëpo, ka këngëtarë shumë të mirë. Unë vetëm do doja t’i lus ata, si një kolege e tyre me një përvojë më të gjatë, mbi 35 vjeçare, të këndojnë këngë të bukura shqipe me bazë melosin tonë popullor, duke e shfrytëzuar këtë thesar që kemi.

Blue Sky: Nga udhëheqja aktuale e kulturës çka do të kërkoje që ata të kenë prioritet mbi prioritete?

Lili:…Opera, baleti, orkestra simfonike veç po ecën mirë…
Të mbahen më shumë koncerte! Dhe në ato koncerte të jenë prezentë, pa keqkuptime, edhe këngëtarët e rinj po edhe ata me moshë të mesme. Le të këndohet kënga e vjetër dhe kënga e re së bashku. Mos të frikohen që kanë konkurrencë se gjithkush në këtë qiell e ka vendin e vet. Pra në koncerte them se është më mirë kur bëhet një kombinim, si në diasporë si këtu, pra një kombinim i së resë me të vjetrën. Këtu te ne, për çudi, këngëtarët e vjetër nuk respektohen, nuk ftohen për incizime për festa të ndryshme. Kujto këtu regjistrimet që bëhen për Vitin e Ri!!! Në botë kjo nuk ndodh. Nëse keni përcjellë RAI 1 ose RAI 2, ose në TV Spanjoll, i shikoj me ëndje se si një Iva Zaniki –këngëtare e njohur, udhëheq me shumë sukses emisione në TV, aty këtu këndon, ose Sanita Montie, Lola Flores e shumë e shumë emra të tjerë të cilat i kanë kaluar të 70-tat dhe angazhohen. Këtu kjo nuk ndodh! Kur angazhojnë këngëtarë, është për të qeshur, por po i bëre 40 vjet thonë : është e vjetër! Po pjekuria e këngëtarit vjen pas të 40-ve, të 50-tave e kupton!? Është mëkat mos të shfrytëzohet zëri që një këngëtar e ka ruajtur dhe është në gjendje të këndojë.

Blue Sky: A kërkojnë këngëtarët e rinj këshilla prej jush?

Lili : Fatkeqësisht shumë rrallë! Ata i dinë të gjitha! Hahahaha!

Blue Sky: Lili, edhe në këtë moshë (nuk po themi sa!) ju jeni shumë e freskët, mbaheni mirë,

Lili: Faleminderit shumë për komplimentet të cilat m’i thonë shpesh! Të them të drejtën janë joshëse, sidomos në këtë moshë, për secilën femër, sepse rinia është vet e bukur dhe e freskët. Falënderoj natyrën, gjenet dhe energjinë pozitive që përshkon shpirtin tim!

Blue Sky: Kur jemi këtu na thuaj sa ka rëndësi paraqitja skenike?

Lili: Artisti-ja në çdo moment, qoftë në shtëpi, qoftë në punë, në rrugë, skenë, e sidomos në skenë, se ajo është shumë e rëndësishme, por edhe komunikimi me njerëzit, duhet pasur kujdes. Duhet mbajtur formën fizike, psikike.

Blue Sky: Komponentë kryesore, për të qenë këngëtar, nuk mjafton vetëm zëri, këtë do të thuash?

Lili: Po pikërisht këtë !

Blue Sky: Në karrierën tuaj komunikimet me Shqipërinë?

Lili: Kam pasur fatin që të shkoj, me ansamblin “Shota”, në Shqipëri diku në vitet e shtatëdhjeta dhe nuk mund ta harroj pritjen që na është bërë! Publiku i Shqipërisë na ka admiruar!

Blue Sky: Po e di këtë! Më patën pyetur në Shqipëri për Ju dhe bile një adhuruese e juaja fliste me emocion për ju, thoshte : kam ëndërr ta takoj Liliana Çavollin! Unë i premtova se kur të vijë në Kosovë do t’ia mundësoj këtë. Nuk të kam marrë leje po shpresoj të mos kem gabuar!

Lili: Nuk i harroj sukseset në Shqipëri. Ishin të mëdha! Çdo takim me adhuruesit e mi në Shqipëri më krijon emocion dhe kënaqësi të posaçme.

Blue Sky: A janë realizuar të gjitha ëndrrat e Lilianës?

Lili : Kam pasur shumë dëshirë të merrem me muzikë klasike. I kam pasur të gjitha predispozitat të bëhem këngëtare e operës, por ja kështu nuk u bë. Erdha në Kosovë, fillova të këndoj..., më morën ujërat e zbavitjes, muzikës zbavitëse, popullore, u punësova... Kështu që as vet nuk u angazhova për ta plotësuar këtë dëshirë, por këtë ua dëshiroj talenteve të reja. Ka shumë prej tyre që vërtet mund të arrijnë. Do t’iu kisha thënë atyre të mos shkojnë të këndojnë nëpër kafene, por ta ruajnë zërin, të shkollohen, se një ditë patjetër që do të funksionojë si duhet edhe ky segment.

Blue Sky ; Ju faleminderit për kohën që na e kushtuat në këtë intervistë si edhe për gjithë atë që keni bërë për vite të tëra për muzikën dhe kulturën tonë në përgjithësi !

 

Thanë për Liliana Çavollin:



Nexhmije Pagarusha

Lilana Çavolli është një këngëtare e shkëlqyer. Ka qenë dhe është edhe sot ! Ajo ka kënduar me të njëjtin sukses si këngën zbavitëse, si atë popullore. Lilana është një soprano e mrekullueshme. Ajo edhe sot është në gjendje të këndojë drejtpërdrejtë. Nuk do të pranonte kurrë të këndojë play beck.

Musa Piperku-kompozitor

Liliana, në kohën kur kemi punuar ne, gjithmonë konsiderohej një zë i spikatur i muzikës popullore, zbavitëse por ka mjaft edhe incizime të muzikës për fëmijë. Ka ekzistuar mendimi i popullit dhe i njerëzve profesionalë se menjëherë pas Nexhmije Pagarushës vinte Liliana Çavolli si interpreto e këtyre zhanreve. Liliana e ka shkolluar zërin gjatë shkollimit të saj. Në shkollën e muzikës në Prizren ajo është marrë edhe me kanton d.m.th., e ka shkolluar edhe zërin. Ajo është e brumosur përveç talentit edhe me një pasuri të rrallë të zërit, interpretimit dhe talentit në përgjithësi. Suksesi më i madh i Lilanës, sipas mendimit tim, është se ajo ka bërë një numër mjaft të madh të këngëve dhe interpretimeve në përgjithësi të muzikës në tri zhanret që i përmenda më lart. Ajo ka marrë pjesë në mjaft festivale, sidomos në “Akordet e Kosovës”, që nga formimi i këtij institucioni kulturor që ka qenë mjaft i madh dhe i popullarizuar për atë kohë. Pastaj Liliana ka marrë edhe shumë shpërblime në akorde. Njëri ndër shpërblimet ka qenë edhe kompozimi im “Floriana” 1973. Gjatë karrierës së saj e kemi pasur Lilianën si simbol të kulturës shqiptare.


Sami Piraj-kompozitor dhe gazetar i muzikës

Para se gjithash është timbri i saj karakteristik, i çiltër, vokacioni i ngrohtë, ngjyra e formësuar, diksioni i qartë që janë bazament i vlerës së kalibrit të këngëtareve të afirmuara. Liliana mbetet me emër në këngën tonë duke iu falënderuar këtyre karakteristikave. Ajo në çdo interpretim të këngëve nuk dëshiron të mbetet e zakonshme. Përkundrazi përjetimi i notave me tekstin mbeten prore preokupim për ta skalitur deri në maksimum atë që ishin dhe mbeten sinonime të këngëtareve tona të mëdha si Nexhmije Pagarusha, Vaqe Zela, Hafsa Zyberi, Naile Hoxha, Fitnete Rexha, Shpresa Gashi, Shahindere Bërlajolli etj.

 

Ardit Gjebrea-kantautor

Është një këngëtare e shquar e muzikës shqipe. Unë e kam ndjekur që kur kam qenë fëmijë me këngëtarët e mëdhenj që kanë ardhur në Shqipëri. Më kujtohet kur për herë të parë e kam dëgjuar të kënduar prej saj “ Zambaku i Prizrenit” jam mrekulluar, vërtet, me zërin e saj dhe gjithmonë më ka mbetur në kujtesë këngëtarja Liliana Çavolli, si një këngëtare vërtet profesioniste, me një zë shumë të bukur dhe shumë të pasur. Më duket pak të them se ishte kënaqësi kur ajo pranoi ftesën tonë të vijë dhe të këndojë në festivalin “Kënga Magjike”. Liliana për mua mbetet një ndër emrat më të mëdhenj të muzikës kosovare.

Engjell Berisha

Liliana është një prej atyre këngëtareve që e prezantoi, jo vetëm në Kosovë por edhe jashtë Kosove në mënyrë dinjitoze, këngën tonë popullore, argëtuese edhe këngën e stilizuar.
Ajo ka një zë me diksion të pastër, të kuptueshëm dhe mund të themi se ka vesh të përsosur, të shkëlqyeshëm. E ka trashëguar nga e ëma se edhe ajo këndonte dikur. Ishte koha kur këndohej me vullnet me dëshirë dhe me shumë dashuri për muzikën, ishte koha kur nuk ishte komercializuar kaq shumë muzika siç është sot. Liliana mundet dhe duhet të këndojë edhe sot me të njëjtin sukses.

Shkurte Fejza

Liliana Çavolli është këngëtare e madhe, me vokal të pashtershëm. Këngëtareve të këtij kalibri si Nexhmijes, Lilit, Shankës etj. ua kam kushtuar këngën “ Mbetsh e re, gjynah me u plakë”. Është i dhimbshëm realiteti kur njeriu e sheh se gjeneratat po ecin, vitet po kalojnë, edhe si shumë të tjerë para nesh, duhet të pajtohemi me këtë. Mirëpo ky proces te zonja Lili ka qenë më i ngadaltë sepse ajo është shumë vitale dhe plot freski. Lili edhe si njeri është treguar e madhe! Kujtoj këtu një rast kur nuk ma dhanë çmimin e fituar “Mikrofoni i Art”! Zonja Lili ka ardhur në Mushtisht dhe ma dha lajmin, e atyre nga lart, se nuk lejojnë që ta marr unë mikrofonin, edhe pse me vota të fituara!!! Ajo më tha : “Eja në manifestim për inat dhe tregoju se nuk mund të të përkulin.’’ Prej atëherë, përveç respektit që e kisha për Lilin si këngëtare, fitova respektin edhe për Lilin - njeri dhe ndërgjegjen që kishte. Lili u bëftë 100 vjeç me të mira. Uroj që gjithmonë në jetë ta shoqërojë kënga.

Faqja e saj

vizitorë prej hapjes së faqes

Për çdo pyetje, vërejtje, kërkesë, shkruani në e-mail.